Print PDF

KNE Kontinua Hala’o Edukasaun Sívika iha Hatulia

edukasaun sivika

GARANTE Eleisaun prezidensiál no eleisaun lejizlativa la’o susesu, Komisaun Nasionál Eleitorál (KNE) oras ne’e daudaun hala’o edukasaun sívika namanas iha distritu.

Hanesan, programa ne’ebé antes ne’e hala’o ona iha distritu seluk, KNE halo sosializasaun ba komunidade sira iha sub distritu Hatulia kona ba oinsá atu partisipa iha eleisaun prezidensiál no eleisaun lejizlativa.

Reprezentante administradór sub distritu Hatulia, Carlos Soares Madeira hateten, programa edukasaun sívika ne’e importante tebes ba votante sira tanba, ema barak mak seidauk hatene kona ba sistema demokrasia ne’ebé mak nasaun ne’e adopta.

Nia dehan, liu husi edukasaun sívika ne’e bele esplika klaru liu tan ba komunidade sira atu kompriende liu tan, direitu no devér sira nian iha partisipasaun eleisaun 2012 nian.

Nune’e, Komisáriu KNE, José Belo hateten, edukasaun sívika importante tebes tanba , papél KNE iha eleisaun atu tau matan ba aktu eleisaun hotu. Ne’e duni, KNE tenke garante determinasaun legál sira tuir konstituisaun, hodi aplika no respeita.

Iha okaziaun ne’e, Komisária KNE, Maria Dulce Vitor hateten, oras ne’e daudaun partidu polítiku 20 mak rejistu ona hodi kompete iha eleisaun jerál 2012.

Nia dehan, KNE nia knaar mak oinsá koopera ho partidu polítiku hotu atu garante prosesu eleisaun too rezultadu finál la’o ho susesu. Tanba, KNE nia knaar maka aprova lei, simu keixa no akompaña prosesu hotu iha kualkér eleisaun.

Komandante PNTL sub distritu Hatulia, Bartolomeu Maia da Silva hateten, PNTL eskuadra Hatulia prontu atu garante seguransa ba populasaun atu tuir eleisaun.

Maibé, nia hatutan, atu garante seguransa la’o di’ak, la’ós servisu PNTL nian de’it, mas ne’e knaar no servisu ema hotu-hotu, inklui lider partidu polítiku, arte marsiál, juventude no entidade hotu.

“Ita hotu tenke koopera ba malu tanba, ita hotu hatene katak iha Hatulia elementu polisia limitadu, maibé ida ne’e la’ós razaun ba PNTL atu la servisu. Ami PNTL prontu oras 24 atu garante seguransa,” tenik nia. (eto)