Print PDF

PNTL Bobonaru Menus Transporte

Polisia Nasional Timor Leste

POLISIA Nasionál Timor Leste distritu Bobonaru difisil atu fó atendementu seguransa ba komunidade sira bainhira akontese kazu ruma, liuliu sira ne’ebé mak hela iha área rurál. Tanba, PNTL distritu Bobonaru menus transporte hodi ajuda sira nia servisu.

Komandante PNTL Distritu Bobonaru, Superintendente João Belo hateten, la iha transporte ne’ebé atu apoiu operasaun patrullamentu ba iha suku no sub-distritu bainhira iha kazu ruma ne’ebé mak akontese iha suku.

Agora daudaun transporte husi karreta sanulu (10) ne’ebé mak iha, karreta tolu (3) de’it mak sei bele funsiona, maibé karreta hitu (7) la funsiona tanba, aat no seidauk halo manutensaun.

“Ami mós halo ona proposta ba ona órgaun kompetente atu rezolve problema transporte, maibé too agora seidauk hetan rezultadu,” tenik nia.

Iha distritu Bobonaru suku hamutuk 50 no membru PNTL ne’ebé hala’o servisu iha distritu ne’e foin mak atinji de’it 126. Ne’e duni, ho númeru ne’e PNTL sira labele halo kontrola másimu ba iha área ne’ebé izoladu.

Asamali do Santos, komunidade distritu Bobonaru husu ba Sekretáriu Estadu Seguransa atu toma atensaun ba situasaun PNTL nian, atu nune’e, bele fasilita sira hodi fó seguransa ba povu Bobonaru.

“Área Bobonaru luan no suku mós barak. Presiza kontrola hotu hodi nune’e ita nia povu bele hakmatek iha sira nia fatin,” tenik nia. (Leonito)