Máfia Iha Atividade Prostituisaun

Print PDF

PRATIKA prostituisaun la’ós kazu foun. Tanba, iha tinan hirak liu ba, Polisia Nasionál Timor-Leste (PNTL) konsege kaptura no deporta ema estranjeiru lubuk ida ne’ebé deskonfia envolve iha atividade prostituisaun.

Klaru katak, iha tinan hirak liu ba, PNTL konsege kaptura ema estranjeiru lubuk ida ne’ebé deskonfia envolve iha atividade prostituisaun. Maibé, tansá ? atividade hanesan ne’e kontinua akontese no Tanbasá, sira tama mai ita la hatene? pior liu tan, sira tama ilegál.

Situasaun ne’e halo komunidade iha kapitál Dili preokupadu tebes. Tan ne’e, husu ba Polisia Nasionál Timor-Leste (PNTL) kontinua hala’o razia ba fatin hirak ne’ebé deskonfia sai hanesan fatin ba prostituisaun. Tanba, atividade hanesan ne’e hafo’er imajen nasaun.

Imigrasaun tenke kontrola ema estranjeiru sira ne’ebé tama sai iha rai laran. Tanba, dala ruma balu mai ho vistu trabailu. Maibé, ita rasik la hatene servisu saida mak sira hala’o iha ne’e.?

Aurélio M. Soares, komunidade husi Pantai Kelapa hateten, se ema estranjeiru ne’ebé tama mai hodi hala’o atividade prostituisaun di’ak liu haruka fila ba sira nia rai. Tanba, Lei la fó dalan ba sira atu hala’o atividade hirak ne’e.

Nune’e mós, Sisto do Santos membru Yayasan Hak hateten, atu evita ema estranjeiru tama mai hodi hala’o atividade prostituisaun, Polisia Marítima ho Imigrasaun tenke kontrola movimentu ema estranjeiru ne’ebé tama sai iha rai laran. Se lae bele fó espasu ba ema atu tama mai hodi hala’o atividade ilegál hanesan prostituisaun.

Hanesan iha tinan hirak liu ba, PNTL konsege kaptura ema estranjeiru lubuk ida ne’ebé deskonfia envolve iha atividade prostituisaun. Ida ne’e hanesan failansu ida. Tanbasá, sira tama mai ita la hatene? No pior liu tan, sira tama ilegál.

“Ami fiar ita nia Polisia Marítima no Imigrasaun hala’o servisu ho profisionál. Maibé, dala barak iha ema balu ne’ebé halo máfia, entaun difisil ba ita nia polisia atu  deteta.” dehan Sisto

Ho fiar an Sisto hateten, se ema estranjeiru tama mai iha ne’e no brani loke atividade pratika prostituisaun, deskonfia iha ema balun sai máfia. Tan ne’e, ema estranjeiru sira mós brani hala’o atividade ida ne’e.

Adjuntu Diretór Servisu Imigrasaun, Luis Barreto rekoñese katak, loos duni, tinan hira liu ba ema estranjeiru barak polisia konsege kaptura no haruka fila. Ema sira ne’e dala barak tama husi oda matan boot fronteira nian.

“ema ne’ebé tama mai iha fronteira ne’e, ami so atende de’it ema ne’e iha pasaporte no vistu ou lae. Se sira iha pasaporte no vistu bele tama. Ami la labele husu sira katak, imi ba Dili atu hala’o serbisu ida ne’e ou ida ne’ebá” dehan Luis

Tuir Luis, dala barak ema sira ne’e dehan, mai vizita família no balu dehan mai rai Timor. Maibé, kuandu hala’o fali atividade ilegál, konserteza ne’e kontra Lei Imigrasaun No. 9/200 maski sira iha dokumentus ne’ebé legál.

Se sira iha dokumentus legál. Maibé, mai hala’o fali atividade ilegál, tenke kaer sira no lori ba prosesu, hafoin mak hala’o deportasaun, se lae selu multa. Maibé, sekarik sira komete krime, entaun tenke lori ba tribunál hodi tuir prosesu krime nian.

Adjuntu Diretór husu ba komunidade tomak bele hato’o informasaun ba polisia, bainhira hare ema tama ilegál hodi hala’o atividade prostituisaun. “komunidade tenke koopera hamutuk PNTL atu nune’e ita bele deteta ema sira ne’ebé tama mai Timor hodi hala’o atividade ilegál” tenik Luis

Sekarik polisia identifika katak, iha fatin ruma mak ema hala’o atividade ilegál, polisia sei tun diretamente hodi hala’o kapturasaun tuir prosesu imigrasaun nian. (**)