Don Basílio: Taur Matan Ruak Ema Importante Ba Nasaun

Print PDF

Pergunta boot mosu iha populasaun Timor-Leste laran tomak. Tanba ema númeru un iha Instituisaun Falintil-FDTL, Xefe Estadu Maiór Majór Jenerál Taur Matan Ruak ne’ebé hakarak rezigna an husi ninia kargu. Hodi sai vida sivíl no hakarak fó oportunidade ba jerasaun foun. Atu lidera Instituisaun ne’ebé refere. Tanba kleur liu ona moris ho vida militár.  Parte Governu apoiu totál ho rezignasaun ne’e. Maibé, parte Estadu ne’ebé nu’udar Supremu sei tetu hela kestaun ne’e no hakarak konsulta hikas ho Governu. Ida ne’e mak sai pergunta no duvida ba entidade hotu iha Nasaun ida ne’e. Tanbasá foti desizaun sei dudu ba mai?

Portantu, atu responde ba konfuzaun boot hirak ne’e Jornalista Tempo Semanál Juvenal Abut. Iha Distritu Baukau tenta husu opiniaun no ha­noin ruma ba liman ain Vati­kanu. Bispu Dioseze Baukau Don Basílio do Nascimento. Kona ba rezignasaun Majór Jenerál Taur Matan Ruak.

Maski, seidauk deside an atu kandidata ba Presidente Rep­úb­lika iha Eleisaun Prezidensiál ti­na­n 2012. Ho karta rezigna an ne’­e­bé dijere ba Presidente no Pri­­meiru Ministru hatudu katak, iha sinál ruma.

Iha mós duvida balun ne’ebé mosu. Bele ou lae Majór Jenerál Taur Matan Ruak avansa ba PR tuir ninia figura?. Klaru liu tan akompaña hamutuk inter vista es­kluzivu. Mezmu, sei sai ha­nes­an rumoris husi ibun ba ib­un. Enk­uantu iha sidadaun balun apoia 100%, balun 50% no balun du­vida.

Tuir Amu Bispu nia hare iha Eleisaun Prezidensiál 2012. Bainhira Majór Jenerál Taur Matan Ruak, karik kandidatu an. Ba figura Presidente oinsá?

Ba figura Presidente Repú­bli­ka importante liu. Ema ida ke re­prezenta Nasaun Timor iha komunidade Internasionál nia leet. Aleinde, ema ida ke fó kon­fia­nsas ba nia povu. Ema ida ke be­l­e sai hanesan garante ba Unidade Nasaun nian.

Biar konstituisaun la fó podér másimu ba Presidente. Maibé, Presidente nia funsaun no kna’ar boo­t tebes tanba sobre deside Na­s­aun nia Vida. Nune’e mós, e­ma ida ke tenke iha kapasidade hodi hatene foti desizaun.

Iha kapasidade hodi hare oinsá bele defende di’ak liu int­erese Nasaun no la halo kon­flitu. Ho Governu ou Órgaun So­b­era­nia sira seluk. Maibé, ema ida ke hat­udu dalan ba Gove­rna­nt­e sira hodi interpreta povu ida ou Nas­au­n nia interese.

Tuir informasaun ne’ebé espalla katak Taur Matan Ruak mós atu kandidatu ba Presidente tuir Amu nia hare bele ou lae?

Kolia kona ba kandidatus na­ran ema ida ne’e (Taur Matan Ru­ak red) mós bele. Iha Konstitui­sa­un hatudu ona dalan, ba sida­daun hotu-hotu ne’ebé ho idade tinan 18 ba leten bele kandidatu an. Ba Sr. Majór Jenerál Taur Ma­tan Ruak ema ida ke iha k­apa­sidade. Ema ida ke iha istória. Mai­bé, talves ‘kemungkinan’ ou po­sibilidade de’it. Tanba, ita seidauk rona loloos husi Majór Je­nerál Taur Matan Ruak nia ibun, hodi fó sai ba públiku.

Nu’udar forsa Majór Jenerál Taur Matan Ruak bele kandidatu-an?

Se karik, Sr. Majór Jenerál Taur Matan Ruak kandidatu-an. Ha’u hanoin nia iha diretu tomak atu hala’o ida ne’e. Maibé, ha’u ha­nesan sidadaun. Ha’u nia preo­kupasaun hanesan interroga­sa­un ida. Se Taur Matan Ruak husik Forsas Armadas hodi kandidatu-an ba Presidente da Repúblika, entaun se mak ba fali ninia fatin.

Tanba, ita mós labele haluha ka­tak, Forsas Armadas im­portán­sia tebes iha Nasaun ida ne’e ninia moris. Sr. Jenerál sai mós hanesan elementu impor­ta­nte tebes, tanba Komandante Forsas Armadas nian.

Karik Amu rekoñese kona ba intelijénsia husi Majór Jenerál Taur Matan Ruak?

Taur Matan Ruak ema ida ke konsesual, simples no ema ida ke haraik an tebes. No intelijénsia boot tebes hodi hare sasan dook. Hafoin ninia prestíjiu makaas, hanesan Komandante luta durante tinan 24 too hotu.

Kuandu, Primeiru Ministru Kay Rala Xanana Gusmão atuál mezmu Komandante boot ne’e loos dunik. Maibé, durante tinan ualu iha dadur laran maski Komandante nafatin maibé Taur Matan Ruak mak komanda tinan 24.  Hanesan prestíjiu ou naran boot. Ha’u hanoin sira hirak ne’e boot hanesan no importante mós hanesan. Ne’ebé Sr. Majór Jenerál Taur Matan Ruak avansa atu ba presidente hafoin povu hili nia, sei halo papél di’ak ida ba Nasaun ida ne’e.

Maibé, rona mós ema seluk kandidatu-an. Hanesan dra. Lúcia Lobato, Dr. José Ramos Horta, Fernando Lasama Araújo, avó Francisco Xavier do Amaral, dra. Maria Domingas Alves, dra. Ana Pessoa Pinto. Maski, ha’u temi mós Dr. Mari Alkatiri nia naran maibé Dr. Alkatiri hateten ona ba ha’u katak pesoalmente nia prefere liu serve nia Partidu duke sai presidente. pj.15

Signifika seidauk too tempu Taur Matan Ruak atu avansa ba oin?

Kestaun la’ós seidauk tempu. Maibé, kestaun ba ha’u hanesan sidadaun katak, Sr. Jenerál Taur Matan Ruak avansa ba oin. Ne’e, desizaun Majór Jenerál nian. Maibé, ha’u hanesan sidadaun husu tanba ita toman ona hodi hare Taur Matan Ruak nia figura hanesan ema ida konsesual. Entaun pergunta ida katak, ida ne’ebé mai tuur fali nia fatin ne’e konsesual hanesan mós nia ou lae. Se, fó garantia entaun la iha problemas ba perguntas ida ne’e.

Hanesan Amu hateten iha festa demokrasia laran iha mós Partidu ne’ebé kandidatu nia ema ba Presidente. Karik iha impaktu negativu no pozitivu. Tuir Amu nia hare ba ida ne’e?

Iha demokrasia laran ema hotu-hotu aprezenta sira ninia ema hodi ba kandidatu an ba Presidente. Atu ema hili ou la hili. Agora sira ida-idak ne’ebé kandidatu-an. Maibé, buat ida negosiasaun ne’e, mezmu iha ita nia oin ne’e sira hotu.  Maibé, husi kotuk sira bele kombina malun hodi dehan o mak di’ak. O lalika mai karik ha’u fó ida ne’e ba o. Depois seluk fali dehan o nia naran boot. Maibé, ema la hili o. Di’ak liu o mai hamutuk ho ha’u. Entaun buat ida polítika. Sira hala’o hanesan dapur ida ba sira. Maski, ita la tama iha laran maibé sira mós te’in etu hanesan mós ita ne’ebé te’in etu atu han.(ts)