Fernandes : PNTL Lautem Prontu Garantia Seguransa

Print PDF

REKURSU umanu no ekipamentu fatór importante ne’ebé atu garantia servisu Instituisaun nian bele la’o di’ak. Hanesan mós instituisaun Polisia Nasionál Timor-Leste (PNTL), ne’ebé iha papél importante ba área seguransa.

Situasaun ne’e afeta mós ba PNTL Distritu Lautem. Tanba, daudaun ne’e PNTL distritu Lautem menus hela rekursu umanu no fasilidade hodi apoiu servisu seguransa nian.

Maski daudaun ne’e, PNTL Distritu Lautem enfrenta hela problema, menus fasilidade no rekursu umanu, maibé kestaun hirak ne’e la impede servisu profisionalizmu PNTL nian, tanba PNTL Distritu Lautem prontu apoiu seguransa iha festa demokrasia (eleisaun 2012).

“Ami sujere ona ba komandu jerál atu prepara kondisaun, liu-liu ekipamentu, hodi nune’e bele apoiu ami nia servisu” dehan António Rego Fernandes, ne’ebé daudaun ne’e asumi kargu nu’udar segundu komandante PNTL Distritu Lautem

Tuir Fernandes, rekursu umanu mós kestaun ida ba sira. Maibé, nia parte espera katak ho rekrutamentu elementu foun ne’ebé la’o hela bele aumenta mós númeru PNTL iha Distritu Lautem.

“Maski membru PNTL Distritu Lautem ne’ebé ativu seidauk sufisiente, maibé ami garantia katak sei fó seguransa másimu iha eleisaun 2012” tenik Fernandes

Totál PNTL Distritu Lautem daudaun ne’e hamutuk 142, maibé ho rekrutamentu ba membru polisia foun Distritu Lautem sei hetan 17 pesoál, mais ida ne’e foin planu tanba daudaun ne’e sei iha prosesu selesaun nia laran.

Ho númeru polisia ne’ebé limitadu, Fernandes husu ba povu Distritu Lautem atu koopera hamutuk ho PNTL, atu nune’e bele estabelese pás no dame iha Distritu Lautem. Liu-liu arte marsiál, lider komunitariu no lider Partidu polítiku sira.

PNTL Lautem Prontu Koopera ho Arte marsiál

Klaru katak, atu garantia seguransa no estabilidade iha rai laran, presiza mós kontribuisaun husi parte hotu-hotu, inklui mós grupu arte marsiál sira. Tan ne’e, PNTL Distritu Lautem sei koopera hamutuk ho grupu arte marsiál iha Distritu Lautem hodi garantia estabilidade.

Fernandes rekoñese katak, durante ne’e mosu duni problema, maibé ida ne’e hanesan problema pesoál, la’ós arte marsiál. Tan ne’e, ami sei funsiona kooperasaun di’ak ho arte marsiál sira.

Kooperasaun Parpol-PNTL Importante

Kampaña eleisaun prezidensiál no eleisaun jerál besik daudaun ona. Partidu polítiku sira komesa tun ba baze halo konsolidasaun hodi ko’alia ida-idak ninia programa, maibé atu garantia prosesu hirak ne’e bele la’o di’ak no susesu, presiza mós iha kooperasaun di’ak entre partidu polítiku ho parte seguransa (PNTL).

Daudaun ne’e, PNTL Distritu Lautem esforsu hela oinsá bele halo kooperasaun di’ak ho partidu polítiku sira ne’ebé eziste iha Distritu Lautem hodi garantia estabilidade. Liu-liu iha tempu kampaña.

Hanesan ita hotu hatene, iha situasaun krize militar 2006, Distritu Lautem moris iha situasaun pás no hakmatek nia laran, tanba iha koperasaun ne’ebe di’ak entre instituisaun PNTL no partidu politika. (Riko)